E skrivet em eus dija, kavout a reoc'h war ar rouedad, hag el liammoù meneget war ar bajenn-mañ tud barrekoc'h evidon evit skrivañ war film-mañ-film, met amañ eo deuet ar c'hoant din da rannañ ar blijadur em eus bet o sellout ouzh pevar rann ar stirad Treme e-pad an hañv ?
Perak sellout ouzh 'Treme" eta, ur stirad ha n'he deus ket graet berzh bras ?
Evit adkavout lod eus komedianed ar stirad "The wire"
Alies-tre e c'heller lenn eo "The wire" ar gwellañ stirad polis savet a-viskoazh, ha n'emaon ket pell o soñjal kement-mañ ! An holl re o deus he gwelet a oar pegen gwirheñvel e oa eztaoladenn buhez poliserien Baltimore, hep darvoudoù a vil-vern, just ar santimant da vevañ ul lodenn eus o buhez, ur stirad a gemere he amzer, a daole ur sell sokial war gudennoù Baltimore hag a groue liammoù soutil etre an arvester hag an tudennoù. 'Treme" eo ar stirad bet savet da heul gant David Simon hag Eric Overmyer, ha gant plijadur e c'heller adkavout meur a aktour a c'hoarie poliserien, e kroc'hen muzisianed ar wezh-mañ, Wendell Pierce en o zouez, kabidan evel boaz !
Evit gouzout pelloc'h diwar-benn efedoù ar gorventenn Katrina
Tremen a ra istor ar stirad e New-Orleans, istor kêr New-Orleans goude gwallzarvoud Katrina eo a vez kontet deomp, dre lagad meur a zen : DJ Davis a fell dezhañ derc'hel hengoun sonerezh New-Orleans, Antoine Batiste bambocher ha soner trombon, Toni Bernette breutaerez a fell dezhi lakaat war-wel emzalc'h direizh polis Nola, Janette Desautel keginerez dornet, Albert Lambreaux penn indian Meurlarjez hag un toullad tudennoù all o treiñ tro-dro dezho. Drezo e weler an holl gudennoù anavezet gant annezidi New-Orleans da heul ar gorventenn : gwask tud ar galloud ganto, evit naetaat ar gêr, ar pezh a dalvez evito skarzhañ ar c'harterioù e-lec'h ma veve ar boblañs du da gentañ penn, skubañ holl roudoù an dremened, ul lodenn vat eus sevenadur Nola war an dro. Ha goulennoù da heul : perak ne vefe ket graet evit Nola ar pezh a zo bet graet evit New-York goude an 11/09/01 pe evit San-Francisco goude ar c'hren-douar ? Lakaet eo war-wel an arc'hant foranet, an diaesterioù boutin, penaos bezañ digollet evit e di p'eo bet savet gant e dad-kuñv war un dachenn bet gounezet d'an diñsoù da skouer, met ivez ar feulster, ar feulster a gaver a-hed ar stirad hep na vefe diskouezet : feulster ar melestradurezh, feulster ar gangs, feulster ar polis. Diskouez a ra ar stirad trafikoù ar maer Ray Nagin, nevez kondaonet da 10 vloaz toull, pe reoù ar polis, o venegiñ darvoudoù Danziger Bridge (daou zen du lazhet ha reoù all gloazet gant ar polis c'hwec'h devezh goude Katrina) pe o kontañ penaos eo bet diskuliet gant ur c'hazetenner drouklazh Henry Glover, un annezad du eus Nola. (Ar prosez da heul, ha n'eo ket kontet er stirad, a zo bet skouerius eus feulster poliserien Nola da heul ar gorventenn)
Evit ar sonerezh
"The music lives where it lives, brother, you can't fight with that". E pep lec'h emañ ar sonerezh e New-Orleans war a seblant, setu ar pezh a ro a stirad da gompren deomp. Evel-just e weler buhez ar sonerien, n'eus ket ur rann hep abadennoù sonerezh filmet war al leurenn pe e studio, met ouzhpenn e reer anaoudegezh gant ur bern muzisianed, lod brudet-kaer (Elvis Costello, the Neville brothers, Winston Marsalis, Cassandra Wilson, Fats domino (bev atav !), John Hiatt...) ha lod all dianav deomp e Europa. Soñjal a ran da skouer e Steve Pearle, ur "steredenn" er Stadoù Unanet hag e Kanada a c'hoari amañ ur muzisian straedoù (hag ur junkie pareet o kas ur strollad-komz e the Wire). Ur gwir dibunadeg eo, re hir eo ar roll... Hag e meur a stil : funk ar bloavezhioù 70, jazz, new-orleans, cajun, Motown ar bloavezhioù 60, kanaouennoù indian ar Mardi Gras, hip-hop, blues ar Mississipi... Betek re a wezhioù, gorrekaat a ra dirolladur an darvoudoù e epizodoù zo met peadra da sevel playlistoù nevez ! Un tañva ho po ?
Evit ar sevenadur
Feiz, n'on ket bet e New-Orleans gwezh ebet hag ur misi eo bet dizoleiñ ar c'hultur stag ouzh hengoun ar Mardi-Gras. N'eo ket tener ar stirad gant sell an douristed ha klask a ra diskouez an traoù deus an diabarzh : 'michañs ho po kement a blijadur ha me o tizoleiñ ar "second line", lid Meurlarjez an Indianed, an dibunadegoù hag o boazioù...Ha dedennus ar goulennoù war an doare ar stourm da gas da benn evit derc'hel ar c'hultur-se bev ha gwirion !
Ha peraket evit ar senario ?
Gant ar stirad-mañ, evel gant "The Wire" e kroger da sellout ouzh buhez an tudennoù, dedennus hepmuiken, hag hep e verzout, e teuer da vezañ stag outo, bez e vouschoarzher pa vezont tener pe fentus ha techet e vezer da leñvañ pa dreuzont poanioù, takennoù liv silet hag a sav ur mozaik buhezek !
![skeudennou-rock 2190[1]](http://img.over-blog.com/300x199/4/69/47/19/skeudennou-rock/skeudennou-rock-2190-1-.jpg)
eta, gant teir leurenn memestra, na bourrus gouzout e c'helloc'h adkavout ho re diboan, ne vo ket da c'hortoz evit pakañ ur banne, ha gouzout ho po souezhadennoù brav adarre ! Ne oan ket evit mont d'ar gwener, (laouen e vefen bet gwelout FFF) met amañ e oamp da eur an digor-galon evit selaou Thomas Fersen. Feiz, ar merc'hed a oa ganin a felle dezho e selaou, me n'on ket evit e c'houzañv, diseblant on bet a viskoazh ouzh e destennoù hag e sonerezh, met petra a gavont dezhañ ?![skeudennou-rock 2194[1]](http://img.over-blog.com/300x199/4/69/47/19/skeudennou-rock/skeudennou-rock-2194-1-.jpg)
Setu Anna Calvi o tont war al leurenn "Ranig", ha tommoc'h e vo he set hag ar wezh diwezhañ 'm boa he gwelet ? Penaos e vo war ul leurenn vras pa glot kentoc'h he sonennoù gant un aergelc'h klet ? Atav ken koant en he roched ruz ha gant he ruz-muzelloù flamm, met ur gened yen, chom a ra diziraesus evidomp ha ne daol ket he selloù warnomp, paour-keizh arvesterien ! Padal, ur wezh ouzhpenn, lavaromp pegen donezonet eo, zoken ma ne oa ket ar c'hemmesk-son eus ar gwellañ. Gwelloc'h eo dizoleiñ ur strollad dianav deomp o seniñ dindan an deltenn : Billy Hornett, ur strollad eus Albi : wao ! Amañ e santer un ene, ene ar rock 'n roll : taboulinoù, gitar,
gourbiolin hag ur rollad tonioù o tennañ d'ar Stay Cats pe d'ar bloavezhioù 50. Netra nevez eta, met un energiezh vrav e servij ur sonerezh na gosha ket. N'eo ket aes-tre dañsal ar rock 'n roll war ar geot evit lod !
Bro-Ghana met o vevañ e Brooklyn : kinnig a ra ur rap afro, leun a levezonioù : Afrika evel-just, Fela, met ivez James Brown pe rap old school New-York. Dont a ra brav flow e gomzoù, ha sintezennet en deus a-feson e wriziennoù hag an hip-hop. Special big up da rann ar binvioù kouevr evit o doare da ac'hubiñ al leurenn ! Tomm tomm tomm eo dirak al leurenn, deomp da welout penaos e tremen gant St-Lô dindan an deltenn : feiz, amañ eo tomm ivez gant al lazerioù, ar c'haner diroll daoubleget war e sinte, an arvesterien tapet en ur meskaj a from, a zebron a grog en ho tiskoaz, ho choug evit diskenn betek ho treid evit ma krogfec'h da zañsal ha da lammat a-unson gant ho amezeien ! un dra zo sur : n'eo ket St-lô a zo war al leurenn, Griefjoy hag e bop-electro, o tont eus Nice, ne lâran ket. 
N'anavezen nemet un ton d'o ferzh, klevet n'ouzon ket pelec'h ken, met ur souezhadenn vrav eo bet. Begon gete 'sur ! Tonioù lirzhin, lijer, evel ma vez dleet evit un nozvezh klouar.
