Ar c'hazh en heol,
war al leton,
lufrus e feur
'dan goulou splann an deiz,
skedus e lagad
'giz ur steredenn,
o vale goustad,
dibilh, skañv ha ouesk,
en ur seurt klokted,
war skramm an hañv alaouret.
Per Diolier
Ar c'hazh en heol,
war al leton,
lufrus e feur
'dan goulou splann an deiz,
skedus e lagad
'giz ur steredenn,
o vale goustad,
dibilh, skañv ha ouesk,
en ur seurt klokted,
war skramm an hañv alaouret.
Per Diolier
Deuet eo "War room stories"pladenn diwezhañ Breton nevez zo, ha war an hent emañ ar strollad evit he difenn. Berzh en doa graet ar strollad e 2012 gant e bladenn "Other people's stories", un albom a gemmeske rock, rap, elektro evit reiñ ur sonerezh lipet, yen, a liv gant golo ar bladenn (barennoù savadurioù skerijennet gant an heol dirak un oabl teñval). Ouzhpenn ar sonerezh eo Breton ( anvet evel-mañ e koun André Breton) ur strollad arzourien hag a douch da bep tra : sevel a reont filmoù, klipoù, levrioù... en ti-bank dilezet o doa ac'hubet e su Londrez, "The Breton labs", pe ar wezh-mañ e "Funkhaus" Berlin.
Kalz lirzhinoc'h eo ar bladenn nevez, luskoù ar c'houplad taboulinoù-gitar boud a lak da soñjal e tonioù lirzhin "The Foals" pe "Foster The People" gwezh ha gwezh all. Jestroù bras an tabouliner (diezhomm met brav da welet gant ar videoioù skignet a-dreñv), lammoù dizehan ar gitarour boud (pe gitarour, pe klavierist, liesbeñveger ma vezont) a gemer perzh er birvilh a c'hounez an arvesterien a-feur ma tirollont o set. Ar bravañ o vezañ evidon an ton "got well soon". War-bouez "Edward the confessor" ez eo dreist-holl an tonioù diwezhañ hag a zo sonet. Brav eo an degemer, tapout a ra Roman Rappak ul luc'hskeudenn eus an arvesterien evit e vamm a-raok kuitaat al leurenn, he deiz-ha-bloaz eo.
Gant skolidi skol Diwan Gwened o tibunañ barzhonegoù Roparz Hemon, Maodez Glanndour, pe Prosper Proux war donioù rap ! link
Div bladenn zo bet embannet gant Epic Rain evit poent, "A murder of crows", un EP e 2011, hag Elegy e 2012. Dizoloet e oant bet e festival Bro Island "Island Airways" hag e Frañs da heul o set en Trans e 2011. Deuet eus an hip-hop he deus o sonerezh sturiet muioc'h mui war-zu ar cabaret, ar folk pe ar blues. Pozioù leun a varzhoniezh, du a-walc'h o taolenniñ tudennoù kollet, ur veaj a-dreñv ar melezour, un aergelc'h teñval, latarek.
Mouezhioù ar ganerien (Johannes B. Palmesson ha Braggy Johannsson a lak ac'hanoc'h da soñjal eTom Waits (ur wezh ouzhpenn) pe e Nick Cave a vareadoù. Ur c'houplad a-feson eo ar ganerien, o taolenniñ o fozioù, o c'hoari gant an arvesterien : klogorennoù saovon, pailhouroù taolet war an arvesterien, un droiad vals gant arvesterezed, goût a reont bevaat ur set a c'hellfe bezañ enoeus mareoù zo, o c'hanaouennoù o vezañ kentoc'h tonioù da selaou sanket en ur gador-vrec'h lêr teuc'h o sellout ouzh ar glav o kouezhañ, pe da goulz ur bourmenadenn war an aod avelet. Gourc'hemennoù ivez d'an DJ Stefan Olaffson evit scratchoù a feson.
C'hoarzhin diwar goust ar re all, c'hoarzhin 'leizh e gof, c'hoarzhin betek mougañ, skrignal, sklokal ! A ya 'vat, fent hon eus bet gant skipailh pezh-c'hoari Mathilda May "Open Space". Un embregerezh un tammig blaz ar c'hozh gantañ, pa seller ouzh an arrebeuri, un implijadez o naetaat al lec'h diouzh noz en un doare ne vefe ket evit displijout din (d'am muiañ karet ne lâran ket !), kuitaat a ra al leurenn, dor ar saverez o tigeriñ hag o leuskel ur bagad implijidi oc'h aloubiñ al lec'h : ar "Remy" treuzwelus a glask sachañ evezh e genlabourerien en aner, zoken pa c'hourdrouz en em lazhañ, ar "bimbo", ar plac'h yaouank kozh Mari-Voudenn anezhi, ar fougaser, an implijad skouer re gozh evit dedenniñ ar re all, al lonkerez... renet gant ur penn-servij aerouant ! Feiz ur sapre dastumad tudennoù an hini eo a ginnig Mathilda May deomp : dirak hon daoulagad e weler an darempredoù e bed al labour : kevezerezhioù, plegoù bihan, pilpouserezhioù, pep tra a zeu da vezañ un digarez da c'hoarzhin gant ar santimant da vezañ er pedervet ment o sellout ouzh amprevaned en ur gaoued !
Diviz ebet gant ar gomedianed, trouzioù nemetken gant ul leurenniñ dik, rik, bamus. Soñjal a reer e Tati, e Deschamps ha Makeïeff... Goût a oar ar gomedianed ober pep tra : c'hoari, kanañ, jestraouiñ, dañsal... ha dreist-holl bezañ fentus ha teneraus.
Kregiñ a ra an droiad betek 2015, ma vez programet tro-dro d'ho ti, na c'hwitit ket ar c'horfad c'hoarzh-mañ !
Tro em eus bet dija da skrivañ pegen plijus e kaven tresadennoù Arthur De Pins pa vefe kaoz eus "Zombillenium" pe eus "Péchés mignons" : Zombillenium : da rannañ gant an holl ! Skip the Use, int, o doa plijet din ar wezh kentañ m'am boa o gwelet, kollet o deus ul lodenn vat eus o energiezh gant ar berzh anavezet buan-tre. Met setu an daou a-gevret goude m'en doa Arthur De Pins goulennet digant ar strollad da sevel B.O ar film "Zombillenium" da zont, lojik evit ur strollad o tont eus norzh Bro-C'hall, rannvro e-lec'h m'emañ lec'hiet ar park dudioù-mañ ken iskis. Ur blijadur eo adkavout tudennoù zombillenium en ur c'hlip ! Evit ar pezh a denn d'ar sonerezh, deoc'h da welout ! (Evit ar re yaouank kwa !)
Feiz, ha koshaat a rafen ? Ne vo ket ma blev evit testenniañ eus kement-mañ p'o deus kroget da wennaat da heul ma c'honje, met n'on ket bet evit profitañ eus abadenn Ebony Bones war leurenn an Echo Nova e Gwened abalamour da vevenn ar 105 desibel na oa ket doujet outi. Evel-just e tle ar son seniñ lous ma fell d'an den pegañ d'ar skeudenn punk, met re vrein e oa evidon. Ha padal, startijenn forzh pegement gant an hini a oa bet anvet er British soap awards pa c'hoarie e "Family affairs" a-raok en em ouestlañ d'ur post-punk-funk psikedelik e 2009. Distro eo war al leurenn gant ur gitarour, un tabouliner hag ur programmour na verzer ket koulz lavaret e skeud al leurenn. Forzh penaos e ac'hub ar ganourez al leurenn gant he huchadennoù, eilet gant he div zañsourez a grou un energiezh ne ra nemet isañ an arvesterien. Penaos e c'heller gwiskañ c'hoazh dilhad ken ridikul ? (Ha kanañ gant ur maskl marc'h war e benn ? A-boan ma vezent klevet !) Met ret eo anzav e roe ur santadur iskis sellout o dañs war al leurenn : un dañs diglok, meuriadel, a roe c'hoant deoc'h da hejañ ho tivrec'h d'ho tro ha da yudal gant ar bagad-bleizi.
Evel m'ho po merzet, n'eo ket bet stank ar skridoù ganin er mare-mañ : ar goañvezh o sunañ ma nerzh ? Lakepoded o c'houlenn ma vefe savet programmoù hiniennel dezho ? Raktresoù e-leizh, ken dedennus an eil hag egile met o c'houlenn un tamm labour ? An tri ma c'haporal, hep kontañ gweladennoù skolioù evit ma lampon bras pa vo bet tizhet ar vachelouriezh gantañ !
En ur c'hortoz ma krogfen da vat gant pennadoù fonnusoc'h, setu ur c'hlip hag a ra vad din p'am bez un tamm blues, e skignet em eus d'am skolidi nevez zo ha plijet en doa dezho ivez. Dizale e tlefemp kemer perzh en ur festival hip-hop aozet e korn-bro Gwened, n'eo ket heñvel met ouzhpenn an huñvre deuet da wir, hag ar spi da gaout evit ar bonedoù azen, en deus ar meskaj dañs klasel-pop komzet dezho. Hag un digarez da gomz eus teorienn ar reizh !
O surfiñ war an net, goude bezañ selaouet un abadenn diwar-benn ar rock da goulz an Union Soviedel link on en em gavet gant un ton anvet "Razom Nas Bahoto" (Asamblez omp niverus), un ton simpl-tre (evel an holl donioù da unaniñ an dud, "When the kids are united...) a zeuas da vezañ kan-bale dispac'h orañjez Bro-Ukrenia e 2004, komzoù eeun evit derc'hel ar straedoù pa ziskenn temperadurioù an noz pell dindan 0. D'ar c'houlz-se e oa bet eilpennet disoc'hoù an dilennadegoù truket (hag en em gavet ar strollad e anv Bro-Ukrenia e koñkour an Eurovision e 2005!) . Met evel m'hen gweler bremañ ez eus pep tra da adkregiñ !
Evel boaz e oan bet ar bloaz-mañ e digoradur "Les hivernales du jazz" e pastell-vro Gwened. War ar roll Grand Pianoramax, ur triad kaset gant Leo Tardin ouzh ar c'hlavieroù, Dom Burkhalter ouzh an taboulinoù hag ar Brooklynad, Black Cracker, o kanañ, ur strollad hag en deus bet tro da seniñ e pep lec'h dre ar bed, ha d'ober lodenn gentañ troiad diwezhañ Maceo Parker er Stadoù Unanet. O federvet pladenn zo deuet er-maez e Bro-C'hall en diskar-amzer diwezhañ.
Ha neuze, war al leurenn ? Feiz 'vat ! Iskis a-walc'h e gwirionez ! Anat eo eo donezonet ar vuzisianed, nijadennoù brav ouzh ar c'hlavieroù (gant ur son a lak da soñjal a -wechoù e Chick Corea da goulz Return To Forever, hag un tabouliner hag a oar kempouezañ e skoadennoù evit tennañ e wellañ eus e venvegoù, met ar c'haner n'eo ket bet evit ma c'hendrec'hiñ : amparfal e seblante din bezañ war al leurenn, hep goût re pelec'h en em lakaat (teneraus e oa en ur mod), hag ar pozioù : clouds, birds, the wind... forzh ma buhez ! N'eus nemet ur wezh m'en deus kroget an tempo da vezañ herroc'h m'en deus seblantet din kavout e verkoù evit tonioù rap tagnousoc'h eget peurrest ar set (Amañ ne oan ket ken evit kompren ar pozioù !). Netra dreistordinal en diwezh !