Pa oa Dylan ur folk-singer, en e yaouankiz, e oa deuet da vezañ, daoust dezhañ, mouezh e remziad gant kanaouennoù o lakaat war-wel ar c’hudennoù sokial, an enebiezh ouzh ar brezelioù, gwirioù ar minorelezhioù… Tregerniñ a ra c’hoazh en hon divskouarn « Blowin’ in the wind », « The times they are a changin’ » pe « A hard rain’s a gonna fall » (skrivet da goulz enkadenn misiloù Cuba).
E 1965 e teu da vezañ un treitour evit e selaouerien evit ar wezh kentañ. Santet en deus emañ an dazont gant ar binvioù tredan, Goulenn a ra digant Mike Bloomfield, ar « Clapton » amerikan da seniñ gantañ : embann a ra ar bladenn « Bringing it all back home », hanter akoustik, hanter-dredan, a-raok embann “Highway 61 Revisited” tri miz goude : un albom rock da vat, ne gomzer ket amañ ken eus tonioù folk tredanet. Pa erru gant e strollad « The Band » war leurenn festival folk Newport, ur festival a anavez mat, eo huet. Penaos en deus kredet ar protest-singer dilezel e c’hitar akoustik hag e harmonika evit gwerzhañ e ene da varc’hadourien an templ, d’ar rock, ur sonerezh kenwerzhel ha boutin ! D’ar 17 a viz Mae 1966 e vez graet « Judaz » anezhañ gant un arvester e Manchester (Bro-Saoz). Padal, domaj e vefe bet tremen e biou « Like a Rolling Stone » da skouer. Ha bezomp sklaer ma vez dipitet lod o koll “mouezh aotret” o stourmoù e c’hounez Dylan azeulerien all gant e destennoù leun a varzhoniezh.
E miz Gouere 1966 eo Dylan uzet : war an hent abaoe meur a vloaz, pouez ar brud war e ziskoaz, an holl zrammoù bet kemeret… d’an 29 eo ar gwallzarvoud pa ruilh gant e varc’h-houarn, un Triumph. “Trellet gant an heol em eus spontet un tammig. Stardet ‘m eus ha sac’het eo bet ar rod a-dreñv. Kollet em eus ar c’hontrol ha kammdroiennet. Hag en em gavet on en ul lec’h dianav, gloazet ma dremm ha ma c’houzoug paket brav ». Setu ar pezh a ziskler.
Embann a ra ar c’hazetennoù eo bet gloazet bras Dylan. An abadennoù tele hag an droiad bedel da zont zo nulet. Met gwall-gevrinus eo ar gwallzarvoud, c’hwezhet pe ijinet penn da benn : roud ebet eus un ambulañs, eus un enskrivadur en un ospital, luc’hskeudenn ebet eus ar Triumph pleget. Met trouzioù a bep seurt a redo d’ar c’houlz-se : marv, skrapet gant ar CIA, oc’h heuliañ ur bareadenn evit en em zizober eus an drammoù… Profitañ a ra deus e retred evit enrollañ gant The Band ul lodenn eus ar pezh a vo embannet dindan an anv « the basement Tapes » er bloavezhioù 1970. Un dra zo sur, pa zistro gant e bladenn « John Wesley Harding » e 1968, en deus cheñchet adarre : ar vouezh, al look, pep tra zo disheñvel, ha mont a ra war-zu ar country a-fet sonerezh.
Met graet e vo Judaz anezhañ en-dro e fin ar bloavezhioù 70 pa zeu da vezañ kristen. Feiz ! N’eo ket ral e kanaouennoù Bob Dylan, Robert Zimmerman eus e anv gwirion, an daveoù d’ar bibl ha da Doue. E 1965 e krog da skouer an albom “Highway 61 Revisited” gant un diviz etre Abraham ha Doue, pe evel-just “Knockin’ on Heaven’s Door”, pa varv ar sherif er western “Patt Garrett and Billy The Kid”, film Sam Peckinpah, savet ar sonerezh gant Dylan. Met diaes eo d’an dud krediñ e teufe ar “yuzev bouddhist” da vezañ Kristen ! Ha padal e tiskler en deus gwelet Jezuz o tont en e gambr leti e Tuckson, pa oa o sellout ouzh un abadenn evanjelist en tele. Badezet eo da heul. Un deiz e lavar d’ur c’hazetenner : « Ar pezh a blij din ar muiañ eo kemer ma c’harr-tan, ma lunedoù heol evit nompas bezañ anavezet, tapout unan bennak o c’hoari biz-meud ha komz dezhañ eus Jezuz ».
Fellout a ra dezhañ testenniañ eus e relijion nevez gant ar bladenn « Slow Train Coming »., ur bladenn lipet brav, produet gant daou bilier eus ar sonerezh soul ,Barry Beckett ha Jerry Wexler. gant Mark Knopfler ha Pick Withers, nevez merzet gantañ er strollad nevez Dire Straits. An droiad a ziaraog ar bladenn en em dreuzfurm e sermonioù e lec’h ma tag an arvesterien hag ar rock e servij an diaoul !
E 1983 e paouez gant ar gristeniezh evit distreiñ da demoù ar judaism er bladenn « Infidels », ur Judaz a lâran deoc’h !